Coronavirus: દેશમાં કોરોનાના દર્દીઓની સંખ્યા 23 હજારને પાર, 718 લોકોએ જીવ ગુમાવ્યા

નવી દિલ્હી: દેશમાં કોરોના વાયરસના કેસ સતત વધી રહ્યાં છે જેના કારણે સરકારની ચિંતા વધી છે. સ્વાસ્થ્ય મંત્રાલયે બહાર પાડેલા આંકડા મુજબ કોરોના સંક્રમિતોની સંખ્યા 23 હજારને પાર થઈ ગઈ છે. જ્યારે મૃત્યુઆંક 718 થયો છે. જો કે રાહતના સમાચાર એ છે કે 4749 દર્દીઓ સાજા થઈને ઘરે ગયા છે. દેશમાં છેલ્લા 24 કલાકમાં કોરોનાના 1684 કેસ જોવા મળ્યા છે. જ્યારે 37 દર્દીઓએ જીવ ગુમાવ્યાં છે. 

આ બાજુ દિલ્હીમાં કોરોના સંક્રમિતોની સંખ્યા 2248 થઈ ગઈ છે. છેલ્લા 24 કલાકમાં 1953 લોકોના સેમ્પલ લેવાયા હતાં જેમાંથી 128 કોરોના પોઝિટિવ નીકળ્યાં. દિલ્હીના જહાંગીરપુરીમાં એક જ ગલીના 46 લોકો કોરોના પોઝિટિવ નીકળ્યાં. તપાસ રિપોર્ટ આવ્યાં બાદ એચ બ્લોકની ગલીને સીલ કરી દેવાઈ છે. દિલ્હીમાં કન્ટેન્મેન્ટ ઝોનની સંખ્યા વધીને 92 થઈ છે. 

મહારાષ્ટ્રમાં કોરોના પોઝિટિવ દર્દીઓની સંખ્યા વધીને 5652 થઈ છે. છેલ્લા 24 કલાકમાં મહારાષ્ટ્રમાં કોરોનાના 778 કેસ સામે આવ્યાં છે. મહારાષ્ટ્રમાં કોરોનાથી જીવ ગુમાવનારાઓની સંખ્યા હવે 269 થઈ છે. નાગપુરમાં એક વ્યક્તિથી 56 લોકોને કોરોના ફેલાવવાનો મામલો સામે આવ્યો છે. 5 એપ્રિલના રોજ 68 વર્ષના એક વ્યક્તિના મોત બાદ તેમનો કોરોના રિપોર્ટ પોઝિટિવ આવ્યો હતો. પરિવારના લોકોનો ટેસ્ટ કરાયો તો તે બધા કોરોના પોઝિટિવ નીકળ્યાં. 

જુઓ LIVE TV

દુનિયાભરમાં કોરોના સંક્રમિતોની સંખ્યા વધીને 27 લાખ 25 હજાર થઈ છે. આ મહામારીના કારણે અત્યાર સુધીમાં 1 લાખ 91 હજાર લોકોએ જીવ ગુમાવ્યાં છે. સાજા થનારા દર્દીઓની સંખ્યા વધીને સાડા સાત લાખ નજીક પહોંચી છે.